មនុស្សយើងម្នាក់ៗអាចនឹងមានផ្លូវជីវិតដែលត្រូវដើរខុសៗគ្នា ហើយគោលដៅដែលយើងចង់ទៅដល់ក៏មិនដូចគ្នាដែរ។ អាស្រ័យហេតុនេះ យើងពិតជាមិនអាចប្រើស្ដង់ដារួមណាមួយដើម្បីកំណត់និយមន័យនៃជោគជ័យរបស់មនុស្សគ្រប់ៗគ្នាបានឡើយ។ ចំពោះការសិក្សាក៏ដូចគ្នា យើងអាចនឹងចាត់ទុកពិន្ទុខ្ពស់ឬនិទ្ទេសល្អ ជាស្ដង់ដាកំណត់ភាពជោគជ័យក្នុងការសិក្សារបស់យើង ប៉ុន្តែបញ្ហាគឺស្ថិតនៅត្រង់ថា តើសិស្សដែលមិនទទួលបានពិន្ទុខ្ពស់ឬនិទ្ទេសល្អ សុទ្ធសឹងតែជាសិស្សដែលបរាជ័យឬ? តើជោគជ័យក្នុងការសិក្សា ពិតជាអាចកំណត់នូវជោគជ័យនៅក្នុងជីវិតបានដែរឬទេ? ហេតុអ្វីទើបសិស្សជាច្រើនដែលរៀនពូកែនៅក្នុងសាលា បែរជាមានបញ្ហានៅក្នុងជីវិតនិងការងារទៅវិញ?
តាមរយៈសៀវភៅមួយក្បាលនេះ យើងនឹងទៅកំណត់និយមន័យជាថ្មីនៃជោគជ័យក្នុងការសិក្សា ហើយបន្ទាប់ពីបានកំណត់និយមន័យជាថ្មីរួចហើយ យើងប្រាកដជាអាចឆ្លើយបានថា “និទ្ទេស មានភាពសំខាន់ឬអត់ចំពោះជីវិតរបស់មនុស្សយើងម្នាក់ៗ”។
