នៅក្នុងប្រទេសកម្ពុជាយើង ការធ្វើការជាក្រុមតាមបែបធីមវើក អាចពុំមែនជាអ្វីដែលថ្មីនោះទេ សូម្បីតែការកសាងប្រាសាទរាប់រយរាប់ពាន់របស់បុព្វបុរសយើងគឺសុទ្ធតែពឹងផ្អែកលើធីមវើកទាំងអស់ ព្រោះគ្មានកិច្ចការធំដុំណាអាចសម្រេចបានដោយពុំមានធីមវើកនោះទេ។ លុះសម័យក្រោយៗមកដែលយើងចុះខ្សោយជាបន្តបន្ទាប់នោះ ការគ្មានភាពរឹងមាំអំពីធីមវើក គឺជាកត្តាមួយនៅក្នុងនោះដែរ។ ធីមវើក គឺជាកត្តាដ៏សំខាន់សម្រាប់អនុវត្តកិច្ចការទាំងតូចឬធំ ក្នុងគ្រួសារ ក្រុមហ៊ុន សង្គម ឬកិច្ចការប្រទេសជាតិ។
សៀវភៅ “បទបញ្ញត្តិដែក ១៧ ប្រការដើម្បីសាងធីមវើកដ៏ល្អ” ស្នាដៃរបស់លោក ចន ស៊ី ម៉ក្សវេល ដែលយើងខ្ញុំប្រែសម្រួលជាភាសាខ្មែរជូនជនរួមជាតិបានអាននៅក្នុងដៃនេះ បានបកស្រាយពីគោលការណ៍សំខាន់ៗ និងមានតម្លៃខ្ពស់អនេកសម្រាប់ជីវិតផ្ទាល់ខ្លួននិងសហគមន៍ ដែលខ្ញុំសូមមិនបកស្រាយអ្វីច្រើនទេ ទុកឲ្យប្រិយមិត្តអ្នកអានជួយវាយតម្លៃផងចុះ។
