វណ្ណកម្មដែលលោកអ្នកកំពុងកាន់នៅនឹងដៃនេះ ប្រសូតឡើងដោយការខំប្រឹងប្រែងរបស់សហការីម៉ាញប៊ុក្សរបស់យើងម្នាក់ គឺលោក អូន ស៊ីយ៉ា ដែលយើងតែងធ្លាប់ឮឈ្មោះរបស់គាត់ក្នុងប៉ុស្តិវិទ្យុមានរហស្សនាម គ្រូស៊ីយ៉ា នេះឯង។ គាត់ធ្លាប់បានសាកល្បងនិពន្ធរឿងតាំងពីសម័យទស្សវត្សឆ្នាំ ៧០ មកម្ល៉េះ បានន័យថា គាត់មាននិស្ស័យជាអ្នកនិពន្ធអស់រយៈកាល ៤០ឆ្នាំំរួចមកហើយ។
នៅពេលនេះ ដោយសារតែចំណង់ចំណូលចិត្តក្នុងការអាន និងដោយសារគាត់មានសមត្ថភាពខាងភាសាបារាំងផងដែរនោះ គាត់បាននាំយករឿងប្លែកៗមួយចំនួនមកបកប្រែស្នើជូនអ្នកអានបានអានកម្សាន្ដ ព្រមទាំងជាការជួយឲ្យយើងបានដឹង បានស្គាល់រឿងរ៉ាវចម្លែកៗដែលកើតមានយ៉ាងច្រើនរាយប៉ាយនៅជុំវិញពិភពលោក។
រឿងទាំងនោះមិនត្រឹមតែជាការបង្ហាញរឿងប្លែកៗប៉ុណ្ណោះទេ ប៉ុន្ដែគឺរឿងដែលឆ្លុះបញ្ចាំងពីទំនៀមទម្លាប់ បែបបទសង្គម វិធីដោះស្រាយ និងគតិល្អៗសម្រាប់ត្រិះរិះពិចារណាផងដែរ។
