ការពិពណ៌នា:
ដោយសារតែយើងខ្ញុំបានទទួលសំណូមពរពីប្រិយមិត្តអ្នកអានជាច្រើនឲ្យយើងខ្ញុំធ្វើការ បកប្រែសៀវភៅThe 7 Habits of Highly Effective People ទើបគ្រឹះស្ថានបោះពុម្ពម៉ាញប៊ុក្សយើងខ្ញុំ ខំប្រឹងប្រែងបកប្រែ សម្រួល ពិនិត្យ ដោយចំណាយពេលរួមអស់ប្រមាណពីរឆ្នាំ ទើបសម្រេចបាន ជាស្ថាពរនូវសៀវភៅមួយនេះ។
“ឧបនិស្ស័យ 7 ប្រការសម្រាប់បុគ្គលឆ្នើម” គឺជាស្នាដៃអមតៈរបស់បណ្ឌិត ស្ទីហ្វិន ខូវីយ៍ ដែលត្រូវបានបោះពុម្ពផ្សព្វផ្សាយជុំវិញពិភពលោក ជាង 38ភាសាហើយមានអត្រាលក់ជាង 15លាន ក្បាល រួចមកហើយ។សៀវភៅនេះបានបកស្រាយអំពី “គ្រឹះ” នៃគំនិត ដែលបណ្ដាលឲ្យ មានការផ្លាស់ប្ដូរឥរិយាបថ ព្រឹត្តិកម្ម, ធ្វើឲ្យមានការអភិវឌ្ឍកែលម្អភាពជាអ្នកដឹកនាំ សម្រាប់បុគ្គលម្នាក់ៗ និងតាមទម្រង់លក្ខណៈរួម។ ឧទាហរណ៍ជាក់ស្ដែងប្រទេសកូរ៉េខាងត្បូងបានឲ្យតម្លៃលើសៀវភៅមួយក្បាលនេះ ដោយគេបានបញ្ចូលវា ជាមុខវិជ្ជា មួយក្នុងកម្មវិធីសិក្សាសម្រាប់សិស្ស និស្សិតនៅទូទាំងប្រទេសដែលជំរុញឲ្យប្រទេសមួយនេះទទួលជោគជ័យ យ៉ាងឆាប់រហ័សក្នុងការអភិវឌ្ឍប្រទេស រហូតឈានឡើងមកជាប្រទេសឈានមុខគេនៅទ្វីបអាស៊ី, វ៉ាដាច់ប្រទេសជាច្រើនដែលធ្លាប់រីកចម្រើនជាងខ្លួនមកពីមុន។
ពាក្យ “បុគ្គលឆ្នើម” ក្នុងសៀវភៅនេះសំដៅលើបុគ្គលដែលប្រតិបត្តិកិច្ចការរបស់ខ្លួនប្រកប ដោយប្រសិទ្ធផល ទទួលទិន្នផលខ្ពស់ ទទួលជោគជ័យពិតប្រាកដទាំងផ្នែកសម្ភារៈនិងស្មារតីទាំងសម្រាប់ខ្លួនឯងនិងបុគ្គលជុំវិញ។
សូមថ្លែងអំណរគុណដល់លោក ធន ឆាយពិសិដ្ឋ ជាសហការីបកប្រែ លោក អ៊ុំ វិសុទ្ធ កញ្ញា ពិន ចរិយា និងលោក គង់ រង្សី ដែលបានបូជាអស់កម្លាំងកាយចិត្ត និងពោរពេញដោយក្ដីព្យាយាមក្នុងកិច្ច រួមសហការឲ្យសៀវភៅ ឧបនិស្ស័យ 7 ប្រការសម្រាប់បុគ្គលឆ្នើម នេះមានសុក្រិតភាព មានសេចក្ដីក្បោះក្បាយ ស្រួលអានងាយយល់ ជួយឲ្យអ្នកអានអាចយល់បានដល់ទីជម្រៅនៃគំនិតដែលបណ្ឌិត ខូវីយ៍ ចង់បង្ហាញតាមរយៈភាសាបែបសាមញ្ញ។
យើងខ្ញុំចង់ធ្វើសំណូមពរដល់ប្រិយមិត្តអ្នកអានជាទីគោរពរាប់អានឲ្យមានឪកាសគូសវាសលំនាំជីវិតខ្លួនឯងសាថ្មី ផ្លាស់ប្ដូរផ្នត់គំនិតថ្មី, ផ្ដាច់ខ្លួនចេញពីអ្វីដែលធ្លាប់មានកន្លងមកតាមរយៈវិធីហ្វឹកហាត់សមាធិ ដើម្បីឲ្យយើងបានពិចារណានូវគោលធម៌ប្រចាំខ្លួន ដែលជាការអភិវឌ្ឍនិងផ្លាស់ប្ដូរពីក្នុងចិត្តមកខាងក្រៅ។ សកម្មភាពនេះគឺជាការបើកឪកាសឲ្យយើងបាន ឃើញ ខ្លួនឯង ដោយដកខ្លួនឲ្យផុតពីការជាប់ជំពាក់នៃចំណងផ្លូវចិត្តទាំងឡាយ និងដែលជួយឲ្យយើងបានប្រើ បញ្ញា ក្នុងការមើលឃើញអ្វីៗផ្សេងៗទៅតាមសភាពពិតជាក់ស្ដែង។
ចំណុចសំខាន់នៃសៀវភៅមួយក្បាលនេះគឺ ការងាកមកពិចារណាពីខ្លួនឯង ព្រោះនៅពេលយើងគិតថាបញ្ហាអ្វីៗបណ្ដាលមកពីអ្នកដទៃ មកពីស្ថានការណ៍ឬមកពីអ្វីដែលពុំមែនចេញពីខ្លួនយើង, នេះគឺផ្នត់គំនិតដែលមានបញ្ហាធ្ងន់ធ្ងរបំផុត។ យើងគួរតែផ្លាស់ប្ដូរអាកប្បកិរិយាពីអ្នកកាត់ក្ដីមកធ្វើជាអ្នកបំភ្លឺផ្លូវ, ពីអ្នករិះគន់មកធ្វើជាគំរូដ៏ល្អ, និងពីផ្នែកមួយនៃបញ្ហាមកជាផ្នែកមួយនៃការរកដំណោះស្រាយវិញ។
“ឧបនិស្ស័យ 7 ប្រការសម្រាប់បុគ្គលឆ្នើម” ពុំមែនជាទ្រឹស្ដីផ្សំស្រេច ហើយយកមករៀបរាប់ជាចំណុចគោលៗសម្រាប់មិត្តអ្នកអាននោះទេ, ប៉ុន្តែវាជាសៀវភៅដែលផ្ដោតទៅលើការអភិវឌ្ឍជាដំណាក់កាលតាមលំដាប់លំដោយដើម្បីឈានទៅរកការផ្លាស់ប្ដូរនិងអភិវឌ្ឍខ្លួនឯងជារៀងរហូតតទៅ ព្រោះថាជោគជ័យពិតប្រាកដគឺជាជោគជ័យដែលកើតឡើងនៅក្នុងចិត្តរបស់ខ្លួន ពុំមែនជាការស្វះស្វែងរករបស់ទ្រព្យ, ការប្រមែប្រមូលលាភសក្ការ យសសក្ដិ ការលើកតម្កើង ឬជាសេចក្ដីសុខនោះទេ, តែវាជាការគ្រប់គ្រងលើចិត្តខ្លួនឯងឲ្យបាននេះឯង។
ខ្ញុំសូមគាំទ្រដល់ប្រិយមិត្តអ្នកអានជាទីគោរពរាប់អាន ឲ្យគូសវាសលំនាំជីវិតរបស់ខ្លួនសាជាថ្មី ដោយប្រើសតិសម្បជញ្ញៈដែល ដឹង ពីខ្លួនឯង គួបផ្សំនិងរូបារម្មណ៍ គំនិតច្នៃប្រឌិត និងមនសិការដែលបំភ្លឺនៅក្នុងចិត្ត ព្រោះទោះបីជាពេលនេះយើង គ្មាន តែយើងមានសិទ្ធិ ជ្រើសរើស ថានឹងទៅជាអ្វីបានតាមសេចក្ដីប្រាថ្នា។
មាតិកា:
អារម្ភកថាអ្នកនិពន្ធ
ផ្នែកទី1 : ផ្នត់គំនិតនិងគោលការណ៍
ផ្តើមពីក្នុងចេញទៅក្រៅ
ឧបនិស្ស័យ 7 ប្រការ : ទស្សនៈរួម
ផ្នែកទី2 : ជោគជ័យផ្ទាល់ខ្លួន
ឧបនិស្ស័យទី 1 ភាពប្រូអាក់ទីវ
គោលការណ៍ទស្សនវិស័យផ្ទាល់ខ្លួន
ឧបនិស្ស័យទី 2 ផ្តើមចេញពីគោលដៅក្នុងចិត្ត
គោលការណ៍ភាពជាអ្នកដឹកនាំខ្លួនឯង
ឧបនិស្ស័យទី ៣ ធ្វើកិច្ចការសំខាន់ជាមុន
គោលការណ៍គ្រប់គ្រងខ្លួនឯង
ផ្នែកទី3 : ជោគជ័យក្នុងសង្គម
គោលគំនិតពឹងពាក់គ្នាទៅវិញទៅមក
ឧបនិស្ស័យទី 4 គិតបែបឈ្នះ/ឈ្នះ
គោលការណ៍ភាពជាអ្នកដឹកនាំអ្នកដ៏ទៃ
ឧបនិស្ស័យទី 5 យល់អ្នកដ៏ទៃជាមុន ទើបអ្នកដទៃយល់ពីយើង
គោលការណ៍ប្រាស្រ័យទាក់ទងប្រកបដោយការយល់ចិត្ត
ឧបនិស្ស័យទី 6 ផ្តុំអានុភាពនៃភាពដោយឡែក
គោលការណ៍នៃកិច្ចរួមសហការបែបស្ថាបនា
ផ្នែកទី 4 : បន្ថែមថាមពលជីវិត
ឧបនិស្ស័យទី 7 សំលៀងឲ្យមុតស្រួចជាប្រចាំ
គោលការណ៍តុល្យភាពនៃការបន្ថែមថាមពលជីវិត
ផ្តើមពីក្នុងចេញទៅក្រៅបន្ថែម
ជំពូកបញ្ចប់
សំណួរដែលត្រូវបានសួរជាញឹកញាប់
ភាគបន្ថែមទី១
ការយល់ឃើញកើតឡើងពីការជ្រើសយកទីបញ្ជាការធំផ្សេងៗ
ភាគបន្ថែមទី២
សកម្មភាពមួយថ្ងៃនៃតារាងកាលវិភាគផ្ទាំងទី II នៅកន្លែងធ្វើការ
