ការរីកចម្រើនមានច្បាប់ ឬគោលការណ៏របស់វា។ យើងមិនអាចគេចផុតនោះទេ បើយើងចង់រីកចម្រើនយើងត្រូវតែគោរព។ ទាំងនេះជាច្បាប់នៃការរីកចម្រើនរបស់លោក ចន ស៊ីម៉ាកស្វែល (John C. Maxwell) ។
១. ការរីកចម្រើនត្រូវតែមានគោលបំណង
ការរីកចម្រើនមិនអាចកើតឡើងដោយចៃដន្យនោះទេ យើងត្រូវតែធ្វើអ្វីម្យ៉ាងទើបការរីកចម្រើនកើតឡើង។ យើងត្រូវតែមានផែនការដើម្បីរីកចម្រើន។ យើងត្រូវតែដឹងថាយើងត្រូវទៅណា ដើម្បីរីកចម្រើន។
២. ដើម្បីរីកចម្រើន ត្រូវស្គាល់ខ្លួនឯង
តើអ្វីជាចំណុចខ្លាំង ចំណុចខ្សោយរបស់អ្នក? តើអ្នកស្រលាញ់អ្វី? ហើយជាពិសេសត្រូវសួរខ្លនឯងថាតើអ្នកកំពុងស្ថិតនៅកម្រិតណាពេលនេះ? តើអ្នកចង់បានអ្វីអោយពិតប្រាកដ? បើអ្នកស្មោះត្រង់ដើម្បីឆ្លើយនឹងសំណួរទាំងនេះ អ្នកនឹងឃើញជីវិតរបស់អ្នកឡើងទៅកម្រិតថ្មី
៣. ត្រូវឆ្លុះកញ្ចក់មើលខ្លួនឯង
យើងត្រូវតែមើលឃើញតម្លៃផ្ទាល់ខ្លួនរបស់យើង ដើម្បីធ្វើអោយខ្លួនយើងកាន់តែមានតម្លៃ។ កុំប្រៀបធៀបខ្លួនឯងជាមួយអ្នកដទៃ ប៉ុន្តែត្រូវប្រៀបធៀបខ្លួនឯងឥលូវ នឹងពីមុនតើខុសយ៉ាងណា នឹងតើឥលូវ និងអនាគតដែលយើងចង់បាន តើខុសគ្នាយ៉ាងណា? ឈប់និយាយអ្វីដែលអវិជ្ជមានដាក់ខ្លួនឯង ហើយចាប់ផ្ដើមមើលឃើញតម្លៃខ្លួនអោយច្រើនជាងមុន ពេលនោះយើងនិងឃើញការរីកចម្រើនកើតឡើង។
៤. ត្រូវចេះសញ្ចឹងគិត
មនុស្សជាច្រើនគិតតែធ្វើនេះ ធ្វើនោះ ប៉ុន្តែមិនដឹងថាហេតុអ្វីខ្លួនធ្វើវា។ ដូច្នេះយើងត្រូវឈប់មួយភ្លែត ហើយយកពេលទៅសញ្ចឹងគិតថាតើអ្វីដែលយើងកំពុងតែធ្វើនេះ អាចធ្វើអោយយើងរីកចម្រើនដែរឬទេ?
៥. ត្រូវមានអត្តចរិកមិនបោះបង់ចោល
ត្រូវចេះលត់ដុំខ្លួនដើម្បីកុំអោយឆាប់បោះបង់ចោលគោលដៅដែលយើងចង់ធ្វើលឿនពេក។ ត្រូវតែមានអត្តចរិករឹងមាំ មិនបោះបង់ចោលចំពោះគោលដៅនៃការរីកចម្រើនរបស់យើង។
៦. ត្រូវពិនិត្យមើលបរិយាកាសជុំវិញខ្លួនយើង
បើអ្នកគិតថាអ្នកល្អគ្រប់គ្រាន់ហើយ អ្នកនឹងពិបាកក្នុងការរីកចម្រើន ព្រោះអ្នកកំពុងតែស្ថិតនៅក្នុងបរិយាកាសមួយដែលអ្នកគិតថា រីកចម្រើនប៉ុនហ្នឹងគឺគ្រប់គ្រាន់ហើយ។ ដូច្នេះយើងត្រូវដឹងថាបរិយាកាសដែលយើងកំពុងតែស្ថិតនៅ ហើយចេះប្ដូរបរិយាកាសដើម្បីការរីកចម្រើន។ វានឹងពិបាកសម្រាប់អ្នករីកចម្រើន ប្រសិនបើអ្នកនៅកន្លែងដែលមិនរីកចម្រើន ឬកន្លែងដែលស្ថិតនៅមិនជំរុញអ្នក។
៧. ត្រូវចេះបង្កើតថ្មី
បើអ្នកមិនចេះបង្កើនខ្លួនឯងអោយធំជាងមុនដោយខ្លួនឯង អ្នកនឹងពិបាកដើម្បីរីកចម្រើន។ វាមិនន័យថា យើងត្រូវរៀនបង្កើតផែនការថ្មីៗ គំនិតថ្មីៗដើម្បីធ្វើយ៉ាងណាអោយមានការរីកចម្រើន។
៨. ត្រូវទទួលយកការឈឺចាប់
បើគ្មានការឈឺចាប់ និងការលត់ដុំខ្លួននោះទេ នឹងគ្មានការរីកចម្រើននោះទេ។ ប្រើការឈឺចាប់ក្នុងជីវិតរបស់អ្នក ដើម្បីបង្កើតឱកាសថ្មី។៩. ត្រូវរៀនពីជណ្ដើរ
យើងចង់ឡើងកាំជណ្ដើរដែលខ្ពស់ យើងត្រូវមើលក្រោមសិនថាតើយើងមានគ្រឺះរឹងមាំដែរឬទេ បើមិនដូច្នោះទេយើងអាចដួលធ្លាក់។ គ្រឺះរបស់កាំជណ្ដើរគឺអត្តចរិក បើអត្តចរិករបស់យើងទន់ខ្សោយ យើងមិនអាចរីកចម្រើនដល់កំពូលបានទេ។ ដូច្នោះយើងត្រូវពង្រឹងអត្តចរិករបស់យើងអោយរឹងមាំ។
១០. ត្រូវរៀនពីរង្វង់កៅស៊ូ
បើយើងទាញរង្វង់កៅស៊ូអោយកាន់ខ្លាំង នោះរង្វង់កៅស៊ូនឹងរីកមាឌកាន់តែធំ ប៉ុន្តែបើយើងមិនធ្វើអ្វីម្យ៉ាងលើវា វានឹងនៅដដែលគ្មានរីកនោះ។ ដូចគ្នាចំពោះការរីកចម្រើន យើងត្រូវទាញខ្លួនឯងអោយដូចជាយើងទាញរង្វង់កៅស៊ូ ពេលនោះយើងនឹងរីកចម្រើន។
១១. ត្រូវហ៊ានលះបង់
បើយើងមិនលះបង់អ្វីដែលចាស់ យើងមិនអាចធ្វើអ្វីដែលថ្មីបាននោះទេ ហើយយើងក៏មិនអាចរីកចម្រើនបានដែរ។ ការរីកចម្រើនកើតឡើងលុះត្រាតែយើងហ៊ានលះបង់ភាពស្រណុកសុខស្រួលមួយចំនួន ហើយចាប់ធ្វើនូវអ្វីដែលលំបាក។ ពេលនោះ ការរីកចម្រើននឹងបន្តទៅមុខជានិច្ច
១២. ត្រូវចេះចង់ដឹងចង់ឃើញ
ដើម្បីរីកចម្រើនយើងត្រូវតែបន្តសួរសំណួរជានិច្ចថា ហេតុអ្វី? ដូចពាក្យស្លោកបុរាណបាននិយាយ អ្នកដែលអាចធ្វើការ តែងតែអាចមានការងារធ្វើ ប៉ុន្តែអ្នកដែលដឹងថាហេតុអ្វីត្រូវធ្វើ គឺតែងតែធ្វើជាចៅហ្វាយគេ។ នៅពេលដែលចេះឆ្ងល់ថាតើហេតុអ្វីអ្នកធ្វើនេះ ហេតុអ្វីអ្នកធ្វើនោះ ពេលអ្នកជាពេលរីកចម្រើនរបស់អ្នក។
១៣. ត្រូវរៀនពីគម្រូ
យើងនឹងពិបាករីកចម្រើន បើយើងគ្មានអ្នកជួយទ្រាំទ្រផ្ដល់យោបល់ដល់យើង។ ដូច្នេះយើងត្រូវការមនុស្សណាដែលគម្រូក្នុងការរីកចម្រើន ដើម្បីធ្វើជាគ្រូរបស់យើង។
១៤. ត្រូវតែបន្តពង្រីកខ្លួនឯង
អ្នកជំនាញភាគច្រើនជឿថា មនុស្សយើងប្រើប្រាស់សមត្ថភាពបានត្រឹមតែ ១០% ប៉ុណ្ណោះក្នុងជីវិត។ ដូច្នេះយើងត្រូវពង្រីកខ្លួន បង្កើនសក្ខានុពល ព្រោះយើងអាចធ្វើបានច្រើនជាងនេះ។
១៥. ត្រូវចេះចែករំលែក និងបង្រៀនបន្ត
មនុស្សដែលរីកចម្រើនជាមនុស្សដែលអាចធ្វើអោយអ្នកដទៃទៀតរីកចម្រើនតាមខ្លួនដែរ។ ប៉ុន្តែយើងត្រូវតែរីកចម្រើនខ្លួនឯងជាមុន មុនពេលយើងធ្វើអោយអ្នកដទៃរីកចម្រើន។ កាលណាយើងចែករំលែកនូវអ្វីដែលយើងចេះយើងកាន់តែចេះជាងមុនទៅទៀត៕
(ដកស្រង់ចេញពីសៀវភៅ៖ ច្បាប់ទាំង១៥ នៃការរីកចម្រើន)
